今朝剩番一張早餐劵， Daddy自己一早起身落去食完早餐後便到外面逛逛，我同阿女繼續做爛瞓豬。等佢返黎後又到我出動，去買Narita Express 嘅車票出機場，乘搭6點幾飛機返香港。
雖然酒店都有Limousine bus，但我地每次都總係喜歡坐 Express 去機場，可能感覺上比較舒服d啦！
Check out 後寄存行李在酒店，就出發作最後衝刺繼續shopping。
到左食lunch時候，其實本來一早諗住去食蟹道樂，但已經shop到成12點幾，我地又book左2:40 p.m. 嘅Narita Express去機場，不過見都有成２個鐘，應該夠時間掛，唔理咁多，一於去食番餐。
坐低立即叫左兩個餐
諗住快快趣食完走人，點知食左一陣先知大獲，原來佢地要逐道菜慢慢上（可能以前每次都係食dinner，唔趕時間，可以慢慢嘆，唔覺佢咁慢）。
仲要好遲先拎個炭爐出黎比我地燒蟹腳
真係你急佢唔急，果然真係食到２點幾都未食完，最後仲有個雪糕甜品未到，點算好？ 唯有兵分兩路，Daddy返酒店攞行李，我同阿女繼續等，仲猛咁催佢地快ｄ，居然都等左成５分鐘先出到杯雪糕，真係服左日本人嘅效率！
食完拿拿臨去車站會合Daddy，立即飛奔到月台，到達時已經2:37 p.m.，真驚險！
花花同波兒一齊坐 Narita Express 去機場
準時4點到達成田機場
Check in後有時間行吓商店，又去左瞭望台睇飛機。
飛機晚上１０點半左右到香港，６日嘅東京之旅話咁快就結束了！
唔知出年係咪都可以去日本呢？
HELLO, 您好呀 你個旅遊BLOG好好睇呀 我地幾位香港熱愛旅行既背包友成立左一個"背包一族討論區" 希望可以提供一個平台讓熱愛旅遊既BACKPACKERS一齊分享下唔同既旅遊業所見所聞 但由於討論區才剛剛成立, 加上幾位自發成立網位既背包友所知有限, 特意前來邀請您成為其中一份子, 前來背包一族討論區一起參與分享和討論 背包一族, 因為我們對旅遊充滿堅持, 對生活有要求, 對世界各地文化滿好奇!!! www.hkbackpackers.net
回覆刪除你好,請問Hotel Century Southern Tower 有 Limousine bus 去羽田機場嗎 ? 點解你會係羽田機場入 , 成田機場走 ?
回覆刪除唔好意思, 我都唔記得Hotel Century Southern Tower 有冇 Limousine bus 去羽田機場, 但肯定有得去成田機場.
回覆刪除而我原本都係book左羽田入羽田走, 但後來通知走果日JAL喺羽田冇開機返香港, 所以改左成田返.