2011@Hard Rock Hotel

5 – 6 July 2011

每年澳門之行，原本今年想擱置一吓，因為舊年居然去了3次之多，但始終成日心思思，只因又係為食，一直都想試吓人地話好多野食嘅自助山 buffet。

由於唔想同人迫，就襯小姐剛開始放暑假，就速速起行，今次又係執定行李去到碼頭先訂房同船票，如果訂唔到，就一天遊算了。格左幾間旅行社價錢，其中Hark Rock有泳池而又在budget 之內，咁就立即扑鎚出發 go go go！

今次住氹仔，所以選擇坐金光飛航，感覺又幾好喎，隻船完全唔拋坐位又寬敞，啱晒最怕暈船浪嘅媽咪呀！

Hark Rock Hotel

房間都幾大，好開揚

遠望就係澳門國際機場

幫襯吓個游池先，個池唔係十分大，但都好好玩

按摩池好正

又有個細細的人造沙灘可以打沙灘排球

游完水又夠鐘出發去食自助山

食物真係好豐富，但時間只得2小時，所以我地都非常忙碌咁不停食食食..………

其實現在澳門的物價一d都唔平，尤其是食肆，所以$258呢個價錢食dinner buffet，真係好抵啊！

食飽飽後順便參觀吓新葡京的展覽品

第二朝一覺醒來就要check out，寄存行李後便過官也街食lunch

搭車經過銀河，下次有機會住吓先

路過間食麵的鋪頭就行入左去，好似話出名食牛雜，咁當然要試吓，但小姐黎到澳門都要食魚旦，真俾佢激奀。

由於烈日當空，實在唔想喺條街四圍行，所以一早諗好去一處室內地方而且又啱小姐玩的新景點，就係澳門科學館喇！

搭巴士去到附近，諗住慢慢行過去，行行吓又經過觀音像，花花又要影番張到此一遊的相片。

點知望吓原來越行越遠，而且沿途都係一個無遮無檔嘅地方，晒到不得了，唔中暑都真係好好彩啊！

裡面分開10幾個展覽館，有唔同主題，的確幾啱小朋友玩，可能係平日關係，唔係太多人，樣樣都可以玩到，相信如果係假期，就會好多人了。

玩到差不多關門，係時候bye-bye，去番手信街買手信，順便食埋dinner

係度食左2個煲仔翅

跟手去埋祥記食蝦子撈麵

然後搭車返氹仔，攞埋行李就bye bye澳門喇！